um texto em patuá por

Mariazinha Lopes Carvalho

 

 

 

Tudo jóvi-jóvi di Casa di Macau

 

Nosso chistoso amigo Tótó ta fazê 65  primavéra  no dia 19 (Fevereiro).  Como hoji nôs tudo já vêm chapado pa estunga almoço di 3^a. idade, nôs querê aproveitá tamêm festejá estunga dia  desejá pa ele más ano bom di vida, inchido di saúde e felicidade.  Sapeca nunca sã importánti, si faltá, sã comê arroz co hám-yi, nádi morê di fómi.

 

Nôs rezá pedi bença di Sinhor pa vôs e vossa família, Dios lôgo uví, lôgo dá.

 

Pa quim non sábi, Tótó sã filo di meo-meo ngâu-sôk com maquista com unchinho di china, non pôde negá  qui nosôtro têm sangue china corê na nossa veia, quim têm más, quim têm menos, e tamém ne bom isquecê....coraçám brasiléro...... porque nôs escolhê estunga terra pa vivê.   Em outras palavras, Tótó,  desculpa iou-sa  atrevimento,  vôs sã unga vira lata....

 

Papá/Mamá já batizá ele com nómi di Julio Augusto Airosa Branco. 

Genti pergunta “quim sã? quim sã?”, ninguén sábi.  Ah mas si falá “Tótó” tudo genti sábi.  Genti antigonso di Macau  conhecê como Filo di Sargento Branco...

 

Sã unga rapaz socegado, nunca sã feio, branco qui branco com cabelo avermelhado, hoji, coitado só têm unchinho fiozinho ralo qui ralo.

 

Com Ama na casa, cêdo-cêdo já aprendê papiá china.  Capaz pronunciá bemfêto “Tchin-tôi” com “Chôn-tói” nunca trucá palavra. Jóvi estuda na Liceu já aprendê  “Parlez-vous Francez”.  Cava já vai “Ông-Công”  trabalhá, qui capaz tesá inglês “Yes I can do”   “No I cannot do”. 

Qui azinha tempo já passá nunca-sã? Agora ta fazê 65 ano, já intra na 3^a. Idade, mas ne bom têm mêdo Tótó, ten tanto ancuza bom pa nôs, exemplo:

 

1)                        Senta bus non precisa pagá, vai cinema pagá metade preço.

2)                        Non precisa impê nunga bicha cumprido qui cumprido no banco e no supermercado, têm bicha curto qui curto pa nôs.

3)                        Têm estunga “Estatuto para Idosos” qui protegê nosôtro, exemplo, si alguém batê na vôs, azinha vai sentá prisám.

4)                        Tiffin na Liberdade pa 3^a. Idade agora só pagá R$5,00.

5)                        Fim destunga ano lôgo recebê pisente di Natal di Casa di Macau, j´ólá?.

6)                        Isperá unchinho na más quando chegá 80 ano, na festa di Ano Novo China, tem genti “châm chá” pa vôs bebê, qui sorti..

 

Assim Tótó nosôtro tudo hoji abrí nosso coraçám e braço pa recebê vôs no nosso team di 3^a. Idade.  Vôs sã unga di nôs agora, com drêto di “GOZÁ” di tudo ancuza bom di vida.  Mas “GOZÁ-GOZÁ”  mesmo, no bom sentido, só Judite é qui sábi.

 

            Parabéns Tótó, Dios dá tanto graça

            Muito ano di vida com saúde e felicidade